自從天水圍得到「悲情城市」呢個名之後，政府同各界紛紛出手援助，好似黎緊一年一度的會展書展，新鴻基地產就準備好「包車包飯」，帶700 個來自天水圍、東涌等地區的基層小朋友到灣仔會展睇書，仲「送佛送到西」，送200 元書券畀佢地，免得佢地有鍾意的書，睇到買唔到。

新地的同事話畀Emily 知，集團相信知識創建未來，所以今次同香港貿易發展局、聖雅各福群會同小書局合辦「新地2008 齊讀好書」計劃，撥款贊助來自東涌、天水圍、元朗、深水步、九龍城、大角嘴同葵涌多間小學近700 個年齡介乎9至12 歲的小朋友免費參觀書展，全程仲會有義工協助同免費午餐。仲有，主辦機構更請黎歌星古巨基同名嘴陳志雲，同小朋友分享讀書心得。Emily 又聽聞，由行會召集人梁振英當主席的專業聯盟，黎緊都會請200 名天水圍中學生，到一眾律師樓、會計師樓「實習」兩星期，等佢地見下世面，將來分分鐘出幾個知名律師、會計師都唔奇。